Este libro é froito da palabra das vinte e unha mulleres que participamos no I Espazo de Teoloxía Feminista, realizado no ano 2011.

Prologado pola teóloga brasileira Ivone Gebara, recolle as reflexións feitas a partir de textos de Margarita Pintos, Rosa Cursach e Lucía Ramón Carbonell cos que buscamos vivir a nosa fe desde a dignificación das mulleres. Coordinaron e coidaron a edición Tareixa Ledo Regal, Maite Pérez Vázquez e Marisa Vidal Collazo.

A obra foi presentada en Santiago de Compostela (na librería Lila de Lilith o 30/11), Pontevedra (Galería Sargadelos, o 7/2), A Coruña (Edificio Fonseca, 23/5) e Vigo (Parroquia do Cristo da Vitoria), amais de na Festa do Lume 2013 da Asoc. Irimia e na Escola de Espiritualidade da Asoc. Encrucillada.

No ano 2010, en colaboración coa Asociación Encrucillada, fixemos unha homenaxe a Engracia Vidal Estévez, que cumpría 80 anos. Engracia leva na asociación dende os seus inicios, e toda a súa vida implicada na Igrexa Galega. Nunha longa entrevista completada con aportes de diferentes persoas fomos facendo un percorrido pola sementeira que é a súa vida.

O periplo serviunos de escusa tamén para facer unha radiografía da Igrexa Galega dende os anos 40 ata a súa entrada no século XXI prestando especial atención ao que para a nosa Igrexa supuxo o Concilio Vaticano II e o Concilio Pastoral de Galicia.

A dirección e coordinación deste proxecto estivo a cargo de María Pilar Wirtz, Maite Pérez, Elvira Santos e Marisa Vidal. Para a portada, ilustracións, maquetación e deseño contamos co bo facer de Pedro Ávila e Soledad Pite. O libro inclúe tamén un DVD coa entrevista a Engracia que fixeron Maite Pérez e Marisa Vidal.

A pegada de Asun non pode quedar envolta no silencio, oculta… As Mulleres Cristiás Galegas conxurámonos para non esquecer o valor das mulleres extraordinarias como ela, e decidimos sacala á luz. Que brille, que sorprenda, que se vexa e que se vexa ben, con cores fortes coma as que ela gostaba de usar no seu vestir.

O libro ten a riqueza dos traballos colectivos, corais, donde moita xente, amigas, familiares, compañeiras de traballo, catequistas, tertulianas,... fomos quen de poñer a nosa palabra para expresar que foi o que aprendemos de Asun, a nosa admiración pola súa capacidade creativa, a autenticidade do seu compromiso, ou todo o cariño que foi capaz de xerar en nós.

O libro ten no deseño de cada páxina a delicadeza que Asun transmitía coa súa personalidade.

En 2006 a Asociación Mulleres Cristiás Galegas Exeria cumpre 10 anos de vida. Celebrámolo editando no 2007 un libro que recolle a voz de todas as fadas de estrano nome que fixeron posible eses dez anos de vida.

Na parte I, a vida vai como un río, lembramos o camiño percorrido. Na parte II, mirándonos nas augas, fixemos reflexión conxunta sobre o camiño andado, e na parte III, a forza das augas abre camiño, trazamos por onde queriamos seguir fluíndo e avanzando.

Esta obra é un traballo de equipo realizado por Tareixa Ledo Regal, Marisa Vidal Collazo, María Wirtz Molezún e Pilar Wirtz Molezún. Editouse coa colaboración da Concellería da Muller do Concello de Santiago de Compostela.