O Sínodo das Mulleres, nace dun malestar que arrastramos dende hai moito tempo e que ten que ver coa situación das mulleres dentro da Igrexa. Unha situación que a cada paso se volve máis insostible debido aos diferentes escándalos que nos últimos anos van saíndo á luz. O malestar xa é moito máis que o feito de que nos ocupen en tarefas subordinadas. A situación das mulleres na Igrexa estase descubrindo nos últimos anos moi dura e mesmo escandalosa. Ao tempo que se destapaban os casos de pederastia, tamén apareceron as denuncias de abusos sexuais a relixiosas, uns abusos recoñecidos polo Vaticano no ano 2020 e que son a punto dun iceberg de maltrato continuado que as mulleres «consagradas» perciben desde hai moito tempo e que non poden seguir sostendo.

O Sínodo da Amazonia tamén puxo en evidencia o silenciamento que as mulleres padecemos na Igrexa. No Instrumentum laboris propoñíase «identificar o tipo de ministerio oficial que pode ser conferido á muller» e mesmo «que se escoite a voz das mulleres, que sexan consultadas e participen na toma de decisións, e poidan así contribuír coa súa sensibilidade á sinodalidade eclesial». Voices of Faith reclamou daquela que puideran votar polo menos as superioras relixiosas presentes na aula sinodal, (cousa que xa pasara con algúns homes superiores de ordes relixiosas no Sínodo de Bispos), pero a súa petición non foi escoitada. As mulleres estamos vendo que a Igrexa se está perdendo a si mesma porque nos está perdendo a nós. Así o denunciaba Lucetta Scaraf!a na carta que publicou ao peche do suplemento Donne Chiesa Mondo.

Hai demasiado tempo que temos a sensación de ser coma o canciño que pasea collido dunha correa. O dono solta a correa mentres o canciño vaia polo vieiro que o amo marca, pero recolle a corda e amarra forte cando o canciño se quere aventurar por sendas propias e diversas. As mulleres amamos a Igrexa, e non imos marchar caladiñas como xa fixeron outros colectivos (clase obreira, xente moza) senón que queremos que a Igrexa mire para si mesma e cambie, porque non queremos ver como se perde do mundo. Por iso convocamos este Sínodo.

As Mulleres Cristiás Galegas Exeria imos empezar imos empezar este traballo sinodal deseñando un calendario de traballo que queremos facer aberto a todas as mulleres que poidan estar interesadas en revisar a súa situación na Igrexa e elaborar propostas que fagan posible o cambio que queremos ver. Se estás interesada en participar, ponte en contacto con nós en mcgexeria@gmail.com ou falando con calquera de nós. 

Como ben dicimos na Revolta, queremos facer oír a nosa voz para que a xustiza, a igualdade e o coidado da casa común sexan costume na Igrexa!